A NÉM MAHNA

 A Nem Mahna!

Satu: Lalrindiki Khiangte (Daduhi)

Awm khua a har lung a leng, khua hmun loh di neih chu;
Eng dang reng thinlaia'n dawn zai rel reng a har ngei,
Lung lam vaiin hrilh a hai, riakmaw iang reng in, 
Mahriakte'n, aw, kaina run ka lo vai e.

A rei lua em, i sakhmel dar ang tawn loh kar,
I ngai hian senlai nau ang tlei a har;
Her chhuak thuai se, aw, sakhmel dar ang tawn leh ni,
Chutin nang ngaih lai lunglen a nem mahna.

Zankhua tlaiin leng zawng chu kawp lai di tang belin,
Tu dang reng ngai lo te'n hlim lai par an tlan e;
I ngai hian e mahriakte'n laikhum zal belin,
Thinlai ruka'n ka dawn vawng vawng thin che.

Theih chang ni se nang ngaih lai ban zai relin,
Hlimte'n tudang reng ngai lo te'n runhmunah leng dun ila;
Nang ngaih vanga suihlunglen sirah hnawl ve in,
I zun ngai a suihlunglen ka bang ve tur.

 A Rem Mai Lawm Ni

Satu: Lalrindiki Khiangte (Daduhi)

Kei zawng riang tur reng hian e, Khuanu'n mi duang em ni?
Hmangaih lungdi ka tawng sual zo tawh si a;
Mahse, tunah chhai lai di val ka tawng min dum tu,
Mahse, lairil hmangaihna min hlan hian ka ring si lo.

Rin zawng har hle mah la e,
Ka hmangaihna zawng zawng hi i tan ka hlan tawh si a;
I dawn lungruk lairil ber a riang hi min hlan ve la,
Muangte'n zan mu chhin ve nan.

Ka duhaisam dawn lungruk ti hian ka hlan nang che,
Nemte'n chhan dan a riang tan lo thiam ve la;
Suihlungrual a hlimtein runhmunah nui dun ve in,
Fanau maltluan chawi ve a lendun a rem mai lo'm ni?

Ka di valmawi, hmangaihna partlan a len dun hi,
Khuanu leng ruat a nih si loh chuanin e;
I tel lo hian suihlunglen engtin nge maw ka tuar dawn?
Suihlung her a lengdang chhai a rem tawh si lo ka tan.

 Min dem lul su!

Satu: Lalrindiki Khiangte (Daduhi)

Thinlai luahtu nang ang reng hi,
Piang leh thei hian ka va ring lo;
Zuapa chang tawh mahla, 
Tlang za rel thang dawn lo in, 
I tang ka bei leh thin.

Min dem lul su lenrual te u,
Tiang reng a lungdum tu hi;
Ka tawng lo vangkhuaan,
Lungmawl in ka tawng tlai e 
Sakhmel-tha -chungchuanga.

Mahriaktea laikhum zalin,
Ka han dawn vawng vawng thin che;
Tuan zai ka rel thei lo,
Min hnem la, aw, min awm la,
Hlim zai ka rel mahna.

Ka ngai zual che zankhua reiin,
Tawn loh kar rei lo te pawh;
Ka tan a sei lua e, 
Min han dawn ve thin che maw,
Kei zawng ka nghilh lo'ng che.

A NA ÉMAI

A Na Emai

 Satu: Lalrindiki Khiangte (Daduhi)

I tan chauh ti a kum tam a liam hnu in,
Hmangaihna parmawi ber thliakin ka rawn hawn che;
Mahse, tawn loh karah khan maw duhlai mi u,
Suihlung min lo her san, aw, a na, a na emai.

I hmangaihna min hlan ve hi, lungngaihna mai a ni,
Ka dawn ngam lo, hmangaih mampui, 
Nang nena kan lenlai ni te kha...

Hmatiang dawn lo a damlai hringnun chen a,
Chun leh zua run in chhung mawitu i nih lai hian,
Kan tiam sa biahthu di thamral tur chu mi u,
Hria in i hai si lo, aw, a na, a na emai.

Aw di, mangtha mai le, 
A rem si lo nang nen lendun hi, 
Aw, a na, a na emai....

 Ka tana chuai lo kha!

Phuahtu: Hugs MCgee Jahau
Thluk siamtu: Bzi Chhangte
Satu: Bzi Chhangte

Ka nghilh loh tur ka tana par,
A vul lai hi ka tan mawi;
A nui ri chu ka tan rimawi,
Ka hlim a ni a kiangah hian.

Chuai lo se ka tan a par,
Ka lung a dum, ka mit a la;
A chhing zo reng an piang lo'ng e,
Hmangaihna duhthusam ka tan vul zel se,
Lawm a kim ngei ang, 
Ka lawm a kim ngei ang aw.

Zaleng tin khumtu sakhmel kha,
A rim a tui, a kiangah hian;
Awm reng ka nuam ka taah chang se,
Ka iai lo, ka duh ve chiang.

A thatna leh duhawmna, 
Sawi ngai lo in an chiang;
A hmel a tha a pian a mawi,
Ka tana chuai lo kha.

Ka tana chuai lo kha karaoke/soundtrack https://youtu.be/tvNoNNzKgyU

 Hmangaihna Pâr

Phuahtu: Lalrammawia
Satu: Lalbiakhlua

Thlang kawr vaia tuantul vanga i liam ni khan e,
Kan vang khawpui a ngui ruai e;
Ka tan khaw ram an lo chang zo ta,
Hrilh ka hai ngei, ar ang ka vai zo ta.

Nghilh theih hian ka mawi lo,
Buan ang pawm a kan hlim lai ni;
A cham reng thin thinlai rukah,
Tawnmang mawl a'n ka phal lo.

I sakruang mawi thlir nin awm lo,
Mitthlaan a cham reng mai, i anka nem a thlum ber mai;
I sakruang mawi nghilh zawng a har ngei mai,
Rinawmte in ka lo nghak reng nang che.

Lam ang i lo let leh ni chuan lawm a kim tawh ang,
Senlai nau iang tah ni zawng te a kiang ang;
Chutin hlimte'n tudang ngai lo ten,
Hmangaihna par chu kan tlan leh dawnnia.

KA HLA

 KA HLÂ

Phuahtu: Dustin Lalkulhpuia
Satu: Jt Production (Zawma)

Tawntirh renga ka hlah phal loh,
I thinlaiah ka cham ve hi; 
Hringnun hi a mawi zual fo thin,
I hmangaihna zuna han uai meuh zawng,
Lenrual selna ka do zova, 
Zah reng ka hre zo lo.

I tan natna ka thlen hian,
Khuanu ka tlawn fiam a;
I zeimawi hmuh fuh tumin duatpui, 
Engkim ka huam fo thin.

Kan chanchin hi hla mawiah, 
Siamin ziak thiam lo ni ila;
Ziaktu ka inti ngam dawn em ni?
Hetiang em a ka thinlung luahtu hi,
Chhiahtna tawpa i awm pawhin,
I ban ka chelh fo ang.

Ka lam hawia i seih hian,
Ka khawih lai ka bang a;
I zun ka vei leh thin duatpui,
Ka hla i ni si a,
I zun ka vei leh thin duatpui,
Ka hla i ni si a.